piang di lereng, tadodong bau nan kambang, tadayuak pinggang nan lamah. Pajalanan si ganjua luluah, tainjak samuik indak mati, pijak talipuak indak layua. Lah duo rantang bajalan, cukuik tigo rantang panjang, dek dakek basarang ampiang, dek ampiang tibo di sanan, di Pakan Akaik Sumulanggang. Bakato si Rajo Ameh,
"Adiak kanduang Bacindai Aluih, dangakan malah dek kau. Bacarai kito di siko, hambo nak masuak ka galanggang, kau pailah mambali; nan sabanta iko kini, cabiak-cabiak bulu ayam, canggang bak awan jo gunuang, baiko batamu pulo."
Bajalan si Rajo Ameh, agak ka tangalı galanggang. Lah duduak inyo di sanan, taruah lah sudah batampin, padan lah sudah dek juaro, ayam kalapeh anyo lai, mamintak ijin jo rila, kapado urang nan basamo. Nan sabanta itu juo, tampak pagawai dari hilia, bagala Rajo Ibadaik, mambao carano loyang, batukuik jo suto kuniang. Lah tibo inyo di sanan, carano taunjuak ka tangah, bakato Rajo Ibadaik,
"Manolah janang jo juaro, sarato rajo di galanggang, nan sutan-sutan di siko. Pihak di badan diri hambo, dek tibo tiko bak hari, dek datang ukatu kini, mambao carano nan batukuik, disuruah Datuk Limpahan, sarato Puti Andam Sarimulia, manjapuik Tuan Rajo Ameh. Baliau ka mari janyo urang, duduak di galanggang sabuang, di medan janang jo juaro. Mamintak hambo nak batamu, adolah rundiang dikatokan, kato sabuah nan marumik, itulah pintak pinto hambo, kapado janang jo juaro, diharok kato nam supatah, kumbali buni pado hambo."
Manjawab janang jo juaro,
"O Tuan Rajo Ibadaik, rundiang nan datang dari Tuan, nan taunjuak kanan banyak, taserak ka muko rapek, dek alua patuik janyo adaik, kami paio patidokan, mananti Tuan sakutiko."
Bakato pulo janang jo juaro, kapado urang di galanggang.
"Manolah kito kasamonyo, nan rajo-rajo di galanggang, nan sutan-sutan di siko, adolah sambah nan mandatang, dari Tuan
43
