Rajo Ibadaik, sarato carano nan batukuik, kapado kito nan basamo, mamintak Tuan Rajo Ameh, baliau nak barundiang batin, di lua medan jo galanggang, Pihak di kito nan basamo, kok ayam sudah babulang, taruah lah sudah batampin, lah samo taunjuak ka tangah, lah nyato talayang ka muko, itulah kato kanan banyak, musyawaraik kito dahulu.”
Manjawab urang nan banyak,
"Nan sutan-sutan di siko, nan rajo-rajo di galanggang, sarato janang jo juaro! Sapanjang kato nan taunjuak, nan tibo di muko rapek, kamilah sudah samupakaik; kok io sambah mandatang, sarato carano nan batukuik, mamintak Tuan Rajo Ameh, kok lai siko baliau kini, lah patuik pinto baisi, lah luruih kandak kito bari. Sapanjang karajo kito iko, pihak diayam ka balapeh, managun kito dahulu, itu pikiaran nan basamo. Katolah tibo pado Tuan, kapado janang jo juaro, kok elok sakato kito, kok tidak dicari juo, maalum pulang pado Tuan."
Bakato janang jo juaro, kapado urang nan rapek tu,
"Manolah datuak janyo hambo, nan sutan-sutan di, siko, nan rajo-rajo di galanggang! Kato bana lah saukua, limbago bana lah sasuai, lah satu paham nan basamo. Pihak di badan diri hambo, samo di dalam itu pulo."
Diulak kaji babaliak, kapado Rajo Ibadaik, bakato janang jo juaro,
"O Tuan Rajo Ibadaik! Sapanjang kato Tuan tadi, nan tibo kapado kami, ka medan galanggang sabuang, ka medan janang jo juaro, sasuai rundiangan nan elok, sakato bana nan baiak adaik rajo tagak jo barih, kalau sambah nan datang, nan tidak buliah diilakkan, sakato kami mambanakan!
Manjawab Rajo Ibadaik,
"Mano janang jo juaro, io galanggang nan batunggak, pihak di badan diri hambo, alua jo patuik lah baturuik, jalan nan pasalah batampuah, niaik mukasuik nak nyo sampai, kapado Tuan Rajo Ameh, maalun pulang pado Tuan, kapado janang jo juaro.”
44
