rundiang batigo sajo, nan tahu Allah jo Muhamaik. Hambo mandapek rundiang nan sah, kato nan tidak basatia, kaba barito dari rumah; sajak kubang Tuan tutuah, sajak aua Tuan rateh, hati urang tak elok lai, inyo lah berang kasamonyo. Kunun dek Pakiah Muhamaik, sapakaik Taram nan Tujuah, rapek rang Batuang Badiri, himpun di Padang Barangan, mupakaik balicak pinang, hampeh mahampehkan deta, hantak mahantakkan tungkek, ka mandorong Tan Rajo Ameh, etan ka kubu di Pandan. Tuan pulanglah kito dahulu, kubu lah batipak-tipak, tipak diurang lah bauni, tipak dikito lah tingga, kubu di Pariang lah rami, kubu di Pandan lah tingga. Tuan pulang, Tuan pulang! Tuan pulang kito dahulu, etan ka Taram nan Tujuah, ka Piliang Padusunan."
V. URANG BADUO BADANSANAK
Baru mandanga kato nantun, barauari si Rajo Ameh, salalu pulang sakali, tak takana ayam tingga, haram tacinto si Bacindai, taruah batampin ditinggakan. Lah sarantang nyo bajalan, agaklah duo rantang panjang, lah tibo inyo di sanan, di Piliang Padusunan, naiak ka rumah nan gadang. Lah duduak si Rajo Ameh sarato jo Marajo Ulak Sumano, tigo jo Rajo Ibadaik, latiah nan bukan alang-alang, payah nan tidak takuaso. Dalam dibimbang nan baitu, kununlah si Kayo Oto, nasi tibo kopi lah datang; minun makan inyo sakali, sarato ibu jo bapaknyo. Agaklah si Rajo Ameh, dimakan nasi sasuok, diminun aia saraguak, inyo lah baranti sajo. Bakato si Rajo Ameh, kapado ibu baponyo,
"O Bapak juo janyo hambo, sarato jo mandeh kanduang, u- tak nan sajak mulo cako, hauih nan tidak tatangguangkan, nasi dimakan raso sakam, aia diminun raso duri, aka samak pikiaran kusuik, angan lah di kubu sajo."
Lah sudah minun jo makan, agaklah si Rajo Ibadaik, jo Marajo Ulak Sumano, sarato ibu bapaknyo, bakato si Rajo Ameh, kapado si Kayo Oto,
"Manolah Adiak kanduang hambo, si Kayo Oto nan bijak, am- biaklah pakaian hambo, pakakeh alaik baparang, manonyo sitengga lamo, sarato padang bacatai, ambiaklah si bantuak alang, sarato dangan tuduang Bantan."
46
