dang lah endan maendan, tinggi lah himpok mahimpok, runciang lah cucuak mancucuak, taram lah luko malukoi, kareh lah takiak manakiak, lah ganti hantak mahantakkan. Pihak di hari nan sahari tu, aluaran kubu di Pariang, nak urang Taram nan Tujuah, inyo lah banyak banan lari, kawan lah tingga sapaduo.
Dek hata takadia Allah, hidayaik pambari Tuhan, nan tingga tisak malawan, lah amuah manyarah diri, bukato si Rajo Ameh kapado Rajo Ibadaik, jo Marajo Ulak Sumano,
"Tuan basentak kito dahulu, etan ka kubu di Pandan, lawan lah banyak nan hilang, antah takuik antah barani, antah inyo mancari aka, balun lai dapek manantukan."
Manjawab Rajo Ibadaik, sarato Marajo Ulak Sumane.
"O Tuan Tan Rajo Ameh, sapanjang kato Tuan nantun, pihak di badan diri kami, karajo nan sajak mulo cako, kok payah lah nak baranti, kok patang patuik bamalam, sapakaik kito tantang itu; bajalan kito sakali, etan ka kubu di Pandan."
Lah sarantang inyo bajalan, lah tibo pulo di situ, di kubu tampak baliku, pakakeh lah sudah dilatakkan, inyo lah pai ka sungai ka aia pincuran tabik, lah mandi baganti-ganti. Sudah pulo sambayang asa, lalu kumbali anyo lai, io ka kubu di Pandan: nan samalam-malam itu, agaklah kecek nan batigo, barundiang rundang di sanan. Aluaran diri Rajo Ameh, nundiang lah banyak nan talanjua, bakato ku mari pai, nan tak tumbuah lah di siang, nan balun ado lah ditimbang, nan tidak bamuko muram, bahati gadang salalu, nan samalam itu juo, bakato si Rajo Ameh,
"Manolah Tuan nan baduo, hari lah laruik tangah malam, panek datang kantuak lah tibo, rabah-rabah kito dahulu."
Bakato Rajo Ibadaik,
"O Tuan Tan Rajo Ameh, kok io kito katidua, kukuahi pasak jo kunci, jagolah diri sorang-sorang, jan lawan disangko kalah. kok tak talawan batantangan, di batin inyo kok mancari, pandayo kito nan batigo."Bakato si Rajo Ameh,
55
