"O Tuan Rajo Ibadaik, sapanjang kato Tuan itu, alemu sudah kito kanduang, samo baama malah kito, kok siang jadikan tungkek, malam elok dipakalang."
Lah samo tidua di sanan, karuah lah batalun-talun, lah sabanta duo banta, lah bangun si Rajo Ameh, lalulah duduak katigonyo, dipandang tadah kalua, matoari lah basarang naiak, paneh lah batambah garang juo, bakato si Rajo Ameh,
"O Tuan Rajo Ibadaik, jo Marajo Ulak Sumano, sadang lalok dalam bana, mimpi datang rasian tibo: raso mamanjek kayu gadang, lah tibo hambo di atehnyo, diliek hilia jo mudiak, dipandang kiri jo kanan, tidak nan tinggi dari awak, rasonyo tidak kalongkahan. Nan sabanta itu juo, talayok pandang ka hilia, kaalua matoari tabik, tampaklah banta-banta tigo, sarato alam-alam kuniang, ruponyo kilau-kilauan. Lah sudah dipandang nyato, awak nak turun ka bawah, tagamang talalu jatuah. O Tuan, apo maananyo?"
Manjawab Rajo Ibadaik,
"Pihak di badan diri hambo, jauah nan tidak tatunjuakkan, hampiang nan balun takakokkan, pikiaran kalawan juo urang banyak awak saketek; kok lamo lambek di siko, sapandai-pandai malompek, sacakap-cakap mahambua, sakali kajatuaḥ juo, itu baru nan takana. Sapanjang mimpi Tuan nantun, usahlah cameh badan Tuan; manuruik bida-bida urang, rasian pamenan lalok, kacimpuang pamenan mandi, galik biaso nan baitu."
Lah sudah inyo barundiang, minun makanlah sakali; lah sabanta antaronyo, bakato si Rajo Ameh,
"Dipandang tadah ka kiun, arah ka kubu di Pariang, nak urang Taram nan Tujuah, sorang pun tidak banan tampak, lah takuik garan itu kini. Hambo nak bajalan-jalan, ka hilia batang Sinimpan, nak tantu hitam putiahnyo kok kalah nak bapumpun abu, kok manang nak bajawek tangan, baitu hati mangko sanang. Mukasuik hambo kakiun, handak mandanga-dangakan rundiang, mancari rasio jo batin, baa sabab karanonyo, nak dapek asa jo mulonyo; Tuan, pai hambo dahulu."
56
