kik, agak ka tabiang pandakian, lah tibo pulo di sanan, lalu naiak ka darek, rakik lah hanyuik hilia aia, inyo lah bajalan sorang. Kununlah Bacindai Aluih, situ baranti lapeh payah, maliek mamandang-mandang, mangana untuang nan tak elok, sisiak jo barih nan tak baiak. Sajauah itu bajalan, hari lah lerek tangah hari, sabaleh lubuak nan talampau, lubuak banamo kasamonyo. Paratamo lubuak Siluwuang, kaduo lubuak Sitingga, katigo lubuak Rangkampai, kaampek lubuak Bancah Dalam, kalimo lubuak Batukalang, kaanam dubuak Kuran-kuran, katujuah lubuak Batu Palano, kasalapan lubuak Batu Baririk, kasambilan lubuak Ambacang Lanjuik, kasapuluah lubuak Kayu Banyak Urek, ka sabaleh lubuak Galinggang Bareh. Payah lapeh inyo lah tagak, bajalan Bacindai Aluih, agak manapi aia lalu, ka lubuak sabalah hilia. Tibo di batu atok tungku, manggapai inyo kakiun. Lah naiak inyo ka batu, bakato sanan Bacindai, inyo barundiang sandirinyo, "Kok pandai awak malompek, bak raso lai talongkahi."
Dipandang turun ka bawah, tampak kapecong aia luluih, nan tidak tantu muaronyo, ombak mahampeh ka batu. Diliek dipandang nyato, buliah lah baralau-alau, bapesong-pesong candonyo. Lah tampak bangkai di sanan, tasampang di ruang batu. Lah sah si Rajo Ameh, basarawa batiak salendang, babaju tauwo ganiah haluih. Lah sirah batalau-talau, io dek darah lihianyo. Sugiro Bacindai Aluih, dicari tenggang jo aka, panjapuik bangkai Rajo Ameh. Diambiak rakik nan hanyuik, bakumpa-kumpa jo buiah, lah ka teh Bacindai Aluih, lalu didayuang ka tangah, tibo di karang nan manonggok, galah di sanan dihantakkan. Bajalan Bacindai Aluih, etan kakalikih batu, dinaiakkan bangkai ka rakik, didayuang suruik babaliak, lalu manapi-napi pasia. Nyatolah tibo dinan dangkek, dibao ka ateh pasia, di situ bangkai tabariangnyo. Disaoknyo jo kain panjang, ditariaknyo pulo kapalo, lalu diukua dikanakkan, diadu urek jo tulang, disusun kulik jo dagiang, dililik jo kain putiah. Bakato Bacindai Aluih, inyo barundiang sorang sajo,
"Mayang padiah hati jo jantuang, hanguihnyo labiah bak tapanggang, maliek untuang badan Tuan, sakik nan tidak ado badukun, luko nan tidak hapalali."Templat:Left
