Lah habih tenggang jo aka, rundiang tak dapek disabuik, rintang dek manangih sajo, lah kalam jalan ka dunia, inyo lah mahisahisak, tangih lah tumbuah şadan-sadan.
Dalam dimabuak nan baitu, tibolah urang sorang sajo, jangguik panjang saroban kuniang, mambao jalo rangkitang, balawai basampiang-sampiang Bakato baliau maso itu,
"Mano rang gadih janyo hambo, bari luruih hambo batanyo, baakoh asa jo mulonyo, baakoh sabab karanonyo, dek tumbuah nan tidak elok, dek mati kawan di siko; siakoh urang nan mambunuah, rang gadih katokan kini, nak buliah hambo dapek tahu."
Manjawab Bacindai Aluih, barundiang sambia manangih,
"Mano Tuanku janyo hambo, nan io-io hambo katokan, rundiang baasa mulonyo, lai basabab bakarano. Takalo maso le hiduik, agaklah Tuan kanduang hambo, parang di kubu di Pariang. urang banyak awak pun sorang, mancik sikua gado saratuih, di malah mungkin ka hiduik. Lah mati Tuan hambo nangko, bacarai nyao jo badan, sampai dipancuang lihia putuih, bacarai tubuah jo kapalo. Kapalo tingga di rumah, badannyo hanyuik ka mari. Lah hambo bao bajalan, dicubo basampan untuang, laianyo rakik batang pisang, kini lah tibo di siko, di aia malantehh batu, dikapecong nan mangeong, di siko bangkai dapeknyo."
Manjawab sanan Tuanku,
"Sapanjang kato rang gadih tu, lah tarang sajak di awa, lah nyato lalu kaakia, lah sanang pulo hati hambo. Tapi samantang pun baitu, nan mati bakalang tanah, nan hiduik dikanduang nyao, kini baakoh nan pikiaran, rang mudo sorang di siko.
Tadanga dikato itu, manjawab Bacindai Aluih,
"Sapanjang kato Tuanku nantun, pihak di badan diri hambo. di mano bumi dipijak, di sanan langik dijujuang, di mans rantau disawang, di sanan tapatan dagang. Kini Tuanku lah ka mari, buruak elok hiduik jo mati, bumi langik payuang jo panci, ibo bapo badan Tuanku. Tapi sungguhpun baitu Tuhan Allah basi paik kayo, sakik nan balun lai baubek, pihak di badan diri hambo, mamintak maminto tolong, ka badan diri Tuanku."
71
