Manjawab sanan Tuanku,
"Sapanjang kato rang gadih tu, pihak di diri badan hambo, lah hibo pulo dalam hati, lah rusuah hambo mamandangi, maliek untuang rang mudo, lah suko hambo manolong, mamintak kapado Tuhan, sarato Nabi jo Rasua. Carilah ramuan ubek, cikarau di sawah lakang, sitawa di ujuang bukik, sidingin tumbuah di batu, sikumpai dibancah dalam, di lurah nan tak baraia, di singkakak nan badukuang, di buayo hitam kuku, sanan taduang siliah pinteh, tampaik ula bidai diam, rang gadih japuiklah ka kiun."
Manjawab Bacindai Aluih,
"Sagalo titah Tuanku itu, hambo nan utang manarimo. Tapi sungguahpun baitu, pihak di badan diri hambo, awak nan ketek mudo matah, alemu balun nan ditaruah, kapandaian saketek tidak, hambo ka bajalan sorang, ka manampuah rimbo rayo, barilah doa agak saketek, agak sapatah duo patah, panguakkan pauni rimbo."
Bakato sanan Tuanku,
"Mano rang gadih janyo hambo, sapanjang pintak nan taunjuak, hambo lah utang mambanakan. Tapi sungguhpun baitu, pegang pitaruah kato hambo; malah alemu lah dikanduang, taguah tagah pacikkan iman, paham yakin dipakaikan."
Manjawab Bacindai Aluih.
"alau baitu janyo Tuanku, kato sapatah hambo pacik, rundiang nan datang di Tuanku, hiduik mati hambo di sanan."
Bakato sanan Tuanku.
"Mano rang gadih janyo hambo, ingek-ingek kau manyimak, doa ka hambo barikan, dibaco sakali sajo, "Ula linak taduang mak banyo tainak-inak, kok duduak manjadi tunggua, kok tagak manjadi batang manjala, manjadi akalah angkau." Itulah buni dany."
Kato putuih rundiang lah sudah, bakato Bacindai Aluih,
“Mano Tuanku jenyo hambo, hambo bajalan kini hari, kok lambek sakelek, kok banyak sansaro ditangguang, usah tuanku pai sajo, nantikan hambo sampai datang."Templat:Left
