inyo lah naiak kateh rakik, batulak hilia sakali, didayuang jo tapak tangan, bagalah batang tibarau, lalu bapantun baibaraik,
”O aia batang Sinimpan,
hanyuikkan malah rakik diri.
Sajak Adiak Tuan tinggakan,
aia diminun raso duri.
O pasia ampasan ombak,
etan ditariak nan balumbo.
Malang jo mujua tak basibak,
o Tuan nanti badan hambo.
Tali rami panjang sapuluah,
jelo bajelo di tapian,
kok panjang balabiah-labiah.
Dalam aia badan bapaluah,
sakik manangguang paratian,
di sanan rusuah nan labiah,
Biduak Tan Sutan dari Panti,
ka mudiak aia disonsong,
singgah ka koto rang Bintungan.
Balun lai tantu hiduik mati,
dibalun ombak nan bapesong,
hanyo dimabuak paruntuangan.
Sajak di Padang Barangan,
darah tak sanang-sanangnyo,
niaik nak hilia aia juo.
Sayang tak lapeh dari tangan,
badan dimalah tasampangnyo,
raso di ruang mato juo.
Suluah padam dinan guntuang,
sua jo tabiang tak basibak,
kalam nan tidak tampak jari.
