Manjawab sanan Tuanku,
"Sapanjang kato rang gadih tu, pihak di diri badan hambo, lah hibo pulo dalam hati, lah rusuah hambo mamandangi, maliek untuang rang mudo, lah suko hambo manolong, mamintak kapado Tuhan, sarato Nabi jo Rasua. Carilah ramuan ubek, cikarau di sawah lakang, sitawa di ujuang bukik, sidingin tumbuah di batu, síkumpai dibancah dalam, di lurah nan tak baraia, di singkakak nan badukuang, di buayo hitam kuku, sanan taduang siliah pinteh, tampaik ula bidai diam, rang gadih japuiklah ka kiun."
Manjawab Bacindai Aluih,
"Sagalo titah Tuanku itu, hambo nan utang manarimo. Tapi sunggushpun baitu, pihak di badan diri hambo, awak nan ketek mudo matah, alemu balun nan ditaruah, kapandaian saketek tidak, hambo ka bajalan sorang, ka manampuah rimbo rayo, barilah doa agak saketek, agak sapatah duo patah, panguakkan pauni rimbo."
Bakato sanan Tuanku,
"Mano rang gadih janyo hambo, sapanjang pintak nan taunjuak, hambo lah utang mambanakan. Tapi sungguahpun baitu, pegang pitaruah kato hambo; malah alemu lah dikanduang, taguah-taguah pacikkan iman, paham yakin dipakaikan."
Manjawab Bacindai Aluih,
"Kalau baitu janyo Tuanku, kato sapatah hambo pacik, rundiang nan datang di Tuanku, hiduik mati hambo di sanan."
Bakato sanan Tuanku,
“Mano rang gadih janyo hambo, ingek-ingek kau manyimak, doa ka hambo harikan, dibaco sakali sajo, "Ula linak taduang linak buayo tainak inak, kok duduak manjadi tunggua, kok tagak menjadi batang manjala, manjadi akalah angkau." Itulah buni doanyo."
Kato putuik rundiang Jah sudah, bakato Bacindai Aluih,
"Mano Tuanku janyo hambo, hambo bajalan kini hari, kok samo lambek saketek, kok banyak sansaro ditangguang, usah Tuanku pai saja, nantikan hambo sampai datang."
72
