Halaman:Bujang Piaman Jo Puti Payuang Lauik.pdf/122

Ditambah arok iyo pulo
Ka baminantu itu garan
Iyo ka Puti rancak anggun
Pamenan Ustano Parik Batu
Idaman Bujang di Pasaman

Bamain silek inyo manang juo
Maalum urang gadang tinggi
Gadangnyo indaklah gapuak
Tingginyo sabao badan
Bamain biaso pulo
Tacenceng namo di galanggang
Dek inyo taruih marandah
Sukolah urang main jo inyo

Katiko si Payuang itu dangai
Disuruah mamiliah nan ka tuju
Di hadapan sidang ka sadonyo
Sarato tigo urang utusan
Dari rajo-rajo nan datang
Dek manuruik adaik di galanggang
Indak buliah di rasiokan
Siapo garan nan tapiliah

Tigo kali urang batanyo
Inyo diam juo baru
Lah sirah muko mandeh Rubiah
Mancaliak inyo ka urang banyak
Baapo garan nan ka elok

Bakato sanan Andeh Suri
Mano nak kanduang Payuang Lauik
Manjawek malah Upiak sayang
Usah lamo urang mananti
Berang beko ayah Upiak ko
Ayah Upiak Tuanku Kajai
Iyo si pangka di alek ko

Bakato sanan Payuang Lauik