Bakato tapatah-patah
Ayam kuriak rambaian jalak
Sadang mangaih dalam padi
Ambiak tampuruang bari makan
Alah ditiliak dari nan banyak
Bujang Piaman tampek hati
Nan lain buliah diharamkan
Tatakua urang nan banyak
Tapi indak ado nan mangecek
Takuik kecek tu salah sasek
Padang jo ameh taruahannyo
Nan labiah takajuik itu garan
Iyo Tuanku Parik Batu
Sarato Tuanku Andeh Suri
Indak inyo sangko saketek juo
Anaknyo nan salalu patuah
Nan manuruik sagalo kato
Kan bapikia nan bak kian
Ndak mungkin pulo itu dangai
Inyo ndak tau kan larangan
Larangan kawin jo rang biaso
Nan bukan rajo atau sutan
Lah acok juo dikilekkan
Inyo batunangan sajak ketek
Jo kakaknyo Lembak Tuah
Urang nan akan jadi rajo
Manggantikan ayah kanduangnyo
Kok indaknyo suko di urangko
Indak saketek itu garan
Urang nan alah manalangkai
Atau mah datang maresek-resek
Tingga mamiliah inyo lai
Sadonyo sutan rajo-rajo
Lai mah kayo-kayo pulo
118
