Alah pai si Payuang Lauik
Sarato gadih nan banyak tu
Iyo dari anjuang galanggang
Babaliak karumah gadang
Bakato sanan Tuanku Rajo
Iyolah Rajo Parik Batu
Kapado si Pangka Rajo Kajai
Manolah Kakak si Pangka alek
Iyolah Kakak rajo Kajai
Usah dangakan kato paja tu
Alun doh itu dari hatinyo
Salah di kami itu garan
Agak kurang manunjuakinyo
Sabagai pulo itu garan
Inyo tu dipandang baru paja ketek
Iyo kan manurúik sajo
Apo nan elok di nan banyak
Inyo maliek urang nantun
Urang mudo Bujang Piaman
Agak tacenceng dari jauah
Iyo dek elok pakaiannyo
Indaknyo tau itu garan
Asa usua urang mudo ko
Inyo mamandang kain baju
Nan di pakai paja nantun
Indak inyo tau itu garan
Inyo ndak buliah jo urang ko
"Ambo bapikia baitu juo
Kito nantik sapakan lai
Buliah inyo ditanyoi pulo
Dalam pado itu garan
Elok andehnyo adiak suruah
Iyo manunjuak ajarinyo
Ndak kan payah itu garan
119
