Inyo tu paja nan elok
Elok di lua jo di dalam
Baitu kato padusi ambo
Kok inyo baranak laki-laki
Iyo taragak dek inyo garan
Maambiak si Payuang kan minantu
Duo hari sasudah itu
Andeh suri naiak ka anjuang
Anjuang perak tampek si Payuang
Di dapekinyo iyo paja tu
Bagolek-golek ateh tilam
Dayang ndak ado surang juo
Maliek andehnyo masuak
Alah duduak tampak si Payuang
Duduak diateh tilam ketek
Di dakek kaki dang andehnyo
Ditakuakannyo kapalanyo
Indak inyo bakato-kato
"Mano nak sayang Payuang Lauik
Lai taraso ko dek Upiak
Apo nan kan mandeh sabuik
Mangko naiak ka anjuang Upiak
Takajuik bana kami hari itu
Mandanga namo Bujang Piaman
Iyo urang nan Upiak piliah
Untuak junjuangan dalam iduik
Upiak kan lai tau juo
Siapo garan urang itu
Urang manumpang tu anak kanduang
Urang manggaleh urang datang
Indak inyo baasa rajo
Inyo elok kapado kito
Inyo maanta razakinyo
Dek inyo manumpang siko
120
