Hatinyo tadorong ka paja tu
Tantang si Bujang Piaman tu
Tampaknyo indak kurang aja
Baiak langkah atau matonyo
Indaklah tampak nan manyalah
Inyo acok mah kamari
Iyo karumah Sari Alam
Indak panah sakali juo
Inyo nan lalu dilaman ko
Wakatu maanta kudo balang
Payah kami manyuruah naiak
Inye nan indak amuah juo
Hanyo sakali inyo naiak
Matonyo lai dijagonyo
Ampunlah ambo Mamak Kanduang
Indak kan mungkin itu garan
Batapuak sabalah tangan
Si Upiak gadih bapikiran
Tau di adaik jo limbago
Kalau ndak ado nan maelo
Indak inyo kan rabah sajo
"Sari Alam denai tanyoi
Baitu Mandeh Rubiah
Indak lah ado tu nan tau
Paubuangan urang baduo ko
Indak ado inyo basuo
Mato si Upiak tu nan kanai
Bia inyo dibujuak sajo
Sasudah si Upiak di tanyoi
Tantu inyo lai mandanga
Tapi manuruik kato nan banyak
Inyo saroman urang ndak tau
Inyo lai datang juo
126
