Barisuak ambo kamari
Tolong suruah andeh suri
Iyo maumbuak si Upiak tu
Katokan ambo kan maubah
Sagalo nan ndak katuju dek nyo
Ambo babaliak mah daulu
Pado malam harinyo sudah itu
Sari Alam pulo nan lah datang
Iyo mahadok ka ayahnyo
'Ampunlah ambo ayah kanduang
Ampun beribu kali ampun
Iyo baapo iko kini
Tantang si Upiak adiak ambo
Iyo si Upiak Payuang Lauik
Mamintak ambo bakeh ayah
Turuikkan juo nan di inyo
Si Upiak biaso ayah manjokan
Sagalo kandaknyo ayah turuik
Nan di hatinyo kini iko
lyo nan iko di turuik juo
Kok indak buruak kan jadinyo
Mano ang buyuang Sari Alam
Manyabalah waang kironyo
Ka adiak ang nan gilo nantun
Indak kato nan ang sabuik
Ndak bajantuang ndak bahati
Utak kudo di kapalonyo
Waang iko niniak mamaknyo
Iyo mamak dek anaknyo isuak
Sato pulo ang indak bapikia
Cubo manuangkan dalam-dalam
Siapo garan kamanakan ang isuak
Kan jadi apo inyo isuak
Kok kayo banalah urang tu
128
