Apo kato urang ka ayah
Indakkoh kito rang baradaik
Urang tau urang bapikia
Caritoko tantu sampai juo
Kok indak kan manyambuik
Urang lainkan bakaba juo
Iyo ka Tuanku Rajo kito
Nan duduak di Pagaruyuang
Sarato Basa Ampek Balai
Nan mamacik adaik di Minang ko
Apo katonyo pado ayah
Iyo salah nan bak iko
Indak dapek tu mah Buyuang
Utang dibayia doso disambah
Dek urang manyangko disangajo
Maagiahkan anak awak
Iyo pado urang panggaleh
Ayah ko iyo urang Koto
Andeh ang basuku Piliang
Labiah bareknyo pado kito
Malangga adaik jo limbago
Kok Buyuang kawin kalua
Indak baapo itu garan
Suku indak turun kaanak
Tapi inyo iyo padusi
Indak panah dibuek urang
Iyo karajo nan bak iko
Mamintak ayah bakeh ang buyuang
Samo-samo kito mambujuaknyo
Kok inyo alun amuah kini
Mamiliah rajo nan ka tuju
Kito nantik barang sataun
Alun talambek itu garan
Umuanyo baru ampek baleh"
130
