Diguguah pintu dek si Sutan
Agak kareh dari biaso
Baru sajo pintu dibukak
Manyambah inyo maso itu
Kato-katonyo ciek-cek
Tagagok manahan hati
Ampunlah kami Ayah Kanduang
Kami datang kan mintak tolong
Tolong barikan pado ambo
Ubek pambunuah biso karih
Untuak ubek dunsanak ambo
Ampia mati itu kini
Ka dibunuah si Lembak Tuah
Sampai hati ayah kironyo
Maagiahkan karih pusako
Untuak pambunuah dunsanak ambo
Urang nan sangaik ambo harokkan
Panolong ambo dalam hiduik
Lah duo taun ambo badagang
Cukuik banyak pitih nan masuak
Adokoh ayah maagiah pokok
Ataukoh, andeh kanduang ambo
Ayah bunuah Bujang Piaman
Anak bapak Malin Duano
Urang badudi bakeh ayah
Inyo bukan maagiah pitih
Indak maagiah ameh urai
Bareh basumpik di bawonyo
Kabau jo kudo di elonyo
Tampak dek urang kasadonyo
Indak basuluah batang pisang
Iyo basuluah mato hari
Bapikia ayah tantang itu
144
