Dipaluaknyo mah andehnyo
O, andeh, andeh kanduang ambo
Mangapo andeh diam sajo
Bak tunggua indak banyawo
Andeh mamacik kunci peti
Ubek jo karih di dalamnyo
Sakongkol kalian kasadonyo
Andak mambunuah ambo nangko
Lah payah andeh manganduang
Lah jariah andeh manggadangkan
Kiniko Upiak kan dikam
Jo karih pusako niniak muyang
Manangih pulo Linduang Cahayo
Mano nak sayang Payuang Lauik
Sajak ampek hari nan lalu.
Kunci dipacik ayah Upiak
Indak andeh tau manau
Karih lah sampai ka si Lembak
Barawari Tuanku Parik Batu
Dibukak peti pusako
Diambiak ubek sulo badak
Tigo boto kasadonyo
Agak tacangang inyo garan
Karih ndak ado di peti tu
Karih tu alah dipulangkan
Kunci salalu di sakunyo
Tapi inyo indak manyabuik
Takuik anaknyo batambah ribuik
Bakato inyo maso itu
Ikolah ubek tigo boto
Balain lain yo gunonyo
Barikan pado dukun katik
Inyo nan pandai mamakainyo
Katokan bana bakeh inyo
147
