Ditangisinyo pulo kapalo tu
Tapi dek inyo sadang sakik bana
Indak inyo bakato-kato
Sabanta datang Katik Basa
Mambawo ubek nan ditawa
Bakato inyo maso itu
Ubekko iyo ubek bana
Sulo badak nan tamusahua
Kok sayang Allah bakeh kito
Lai kan cegak panyakik ko.
Diambiaknyo aia karambia mudo
Nan dicampua jo talua ayam
Iyo talua nan ampia manateh
Nan dirameh jo pisang kalek
Dirameh dengan daun alang-alang
Diputa jo umbuik si tawa
Dibari pulo aia limau
Iyo aia limau kapeh
Disuruahnyo minum aia nantun
Sabanyak-banyak nan takao
Sudah itu barulah pulo
Diminumkan pulo aia sulo badak
Nan lah di randam agak sabanta
Digosokkannyo minyak sulo badak
Iyo sulo dari boto kaduo
Bakuliliang nan sakik tu
Alah sudah itu garan
Disuruahnyo iyo si Payuang
Mambaruik saluruah badan
Jo aia limau tujuah ragam
Nan lah dirandam itu garan
Iyo dalam aia karambia
150
