Tadahkan tangan sakali lai
Mintak malah caro kito
Dalam hati surang-surang
Mamintak sabana pintak
Tuhan kito iyo pangasiah
Kitoko sadang taniayo
Lai kan kabua pintak kito
Kito mamintak jo aia mato
Kito mamintak jo tuluih hati
Usah dicampua tu jo sumpah
Usah dicampuanyo jo kutuak
Jangan Tuhan diajari
Untuak maukun rang nan salah
Iko cobaan pado kito
Adokoh kuat iman kito
Indak guno kito mambaleh
Urang-urang nan mambaleh
Aniayo urang kapadonyo
Mungkin mukasuik sampai juo
Urang mandapek susah pulo
Tapi di kito ndak mah ado
Balasan elok dari Tuhan
Elok kito saba sajo
Urang saba kasihan Allah
Kok Allah handak mambaleh
Inyo babuek sakandaknyo
Indak urusan kito
Nan sakarang kini nangko
Kito mulai mah mandoa
Baco salawaik pado Nabi
Usah mintak pado Nabi
Kito mamintak pado Allah
Bakato sanan Sari Alam
152
