Untuang ambo alun manalangkai
Bia hati tatariak juo
Manungkahak kironyo kurenahnyo
Sasuai jo Sutan Lembak Tuah
Pai urang baduo tu
Iyo kakampuang Simpang Ampek
Pai manjanguak Bida Sari
Andeh rang mudo Bujang Piaman
Disinan inyo dapeki
Urang manangih baibo hati
Bida Sari jo urang nan datang
Nasibnyo inyo tangisi
Anak surang lah pai pulo
Lah taban tanah tampek bapijak
Patah dahan tampek bagantuang
Indak lai ado tampek mangadu
Kok datang sakik ngilu paniang
Siapo urang kan maubek
Lapa kamano mintak nasi
Inyo si Upiak jo si Buyuang
Kaateh indakdoh bakakak
Ka bawah indak doh baradiak
Mambantiang tulang inyo baduo
Mancari razaki untuak anak
Razaki adomah dapek
Nan kan buliah lah pai pulo
Hati siapo ndak kan luluah
Jantuang siapo indakkan ngilu
Paruik siapo ndakkan padiah
Anak lai diaja juo
Pandai-pandai manjago diri
Bakato di bawah-bawah
163
