Kok tampak dek inyo garan
Si Payuang duduak galak-galak
Iyo jo urang nan mambunuah
Batambah ibo tu hatinyo
Alun lai kariang aia mato
Iyo urang di Simpang ampek
Pado katiko patang hari
Limo hari sasudah itu
Tadanga tabuah larangan
Babunyi iyo panjang bana
Duo kali tujuah galuguik
Diguguah kareh-kareh bana
Disalo pulo yo dek aguang
Babunyi sampai tujuah kali
Bahamburan urang banyak
Talabiah manti jo pangulu
Balari anjiang ka ustano
Jaleh tabuah tu tando buruak
Siapo garan nan lah mati
Lah tibo urang di halaman
Tampak darah baserak serak
Darah iduik alun lai baku
Sampai ka anjuang badarah juo
Alun sampai urang mambasuah
Di ateh lamin ruang tangah
Tampak kini mayik tabujua
Iyo di ateh tilam bungo
Itan di ateh palaminan
Lamin galanggang alun dibuka
Karano urang kan baralek.
Jalehlah muko Payuang Lauik
Di bawah kain suto tipih
Urang ndak buliah naiak lamin
165
