Untuak kito manigo hari
Sarato manujuah hari pulo
Iyo manduo kali tujuah
Sudah itu maampek puluah
Disudahi jo manyaratuih hari
Kan ibo hati puti kito
Kok kito indak ka ustano
Pado hari nan cako tu
Kito kan datang kasadonyo
Indak untuak makan minum
Tapi mangaji surek yasin
Sarato tahlil jo mandoa
Dalam hari nan tigo ko
Kito taksiah kasadonyo
Mangaji surek yasin
Jangan ado nan indak datang
Indak tamuek dalam rumah
Dibalairong kito satangah
Di tangah taman dapek juo
Kok untuang hari indak ujan
Duduklah pulo Manti Tuo
Lah tagak garan maso itu
Tuanku Kajai Rajo Janang
Rajo Janang maso galanggang
Nan lah dimintak juo garan
Manjadi si Tuo si Pangka alek
Alek gadang nan kan diadokan
Mangawinkan Puti Payuang Lauik
Iyo jo Sutan Lembak Tuah.
Bakato inyo maso itu.
"Ampun Tuanku Daulat kami
Sarato Kakak Andeh Suri
Baitu adiak Sari Alam
174
