Kito mintak pado Allah
Dijauhkannyo azab kubua
Sarato azab api narako
Diampuninyo kasalahan
Ditarimonyo di sampiangnyo
Mari kito basamo-samo
Mambaco fatihah tigo kali
Lah turun mayik dari tingkok
Tingkok gadang di ujuang suok
Tingkok sangajo untuak itu
Hiruak pikuak ratok jo tangih
Talabiah Puti Ambun Pagi
Andehnyo Sutan Lembak Tuah
Jikok ditampuang dakek-dakek
Buah ratoknyo maso itu
Iyo jaleh atoknyo garan
Mandapek si Payuang kan minantu
Kan padusi si Lembak Tuah
O Nak Kanduang timbunan sayang
Timbunan kasiah urang banyak
Ameh urai di dalam peti
Bungo kambang dalam ustano
Sumarak Koto Parik Baru
Mangapo Upiak baitu
Sapendek itu aka Upiak
Kok Upiak iyo indak suko
Kapado kakak Lembak Tuah
Banyak lai rajo jo sutan
Ndak kurang urang nan amuah
Amuah sumando bakeh Upiak
Kiniko apo kadísabuik
Andeh Upiak marameh paruik
Ayah Upiak manapuak dado
181
