Kan Kakak kuruang Upiak garan
Indak buliah disapo urang
Pado pikiran ati Upiak
Ingin kawin jo kakak Upiak
Nak bagaua jo urang banyak
Nak iduik iyo agak lapeh
Indak dikabek arek-arek
Saroman urang di ustano
Dirantai jo tali duo eto
Bak baruak dijinakkan
Tagalak pulo Buyuang Pamenan
Iyo galak sabana galak
Indak dek manghilangkan tangih
Saroman galaknyo nan cako tu
Bakato inyo maso itu.
"O, Diak Sayang si Reno Manih
Urang sayang iyo pancamburu
Tapi bukan camburu buto
Manapuak manampa bininyo
Dek mangecek jo laki-laki
Dek kanai sapo dek urang bujang
Upiak indak kan dikuruang
Upiak indak kan dikabek
Maikua di katiak kakak
Tapi iyo kan dihindakan
Bagaua bebas jo rang banyak
Talabiah urang mudo-mudo
Upiak buliah kamano-mano
Tapi iyo basamo kakak
Atau basamo urang lain
Nan sagan urang padonyo
Upiak nan indak kanai sapo
Sabagai pulo tu diak kandung
Kok lah datang pitih ayah
Nan kan dibawo kakak kito
Iyolah kakak Sari Alam
194
