Sasudah manyaratuih hari
Ayah kito iyo mah sakik
Antah sakik dek taragak
Antah iyo dek manyasa
Antah pulo dek rusuah risau
Bahari-hari dukun kito
Iyolah dukun Katik Basa
Duduak di dakek ayah kito
Bamacam ubek inyo cubo
Sabulan garan mako cegak
Baru dapek kakak barangkek
Dek kudo Upiak Balang Candai
Upiak mintak dibawo pulo
Baitu kudo hitam mamih
Tapaso kami bakuliliang
Jalan alun panah ditampuah
Manggua aguang sapanjang jalan
Baru sampai kami di siko
Dari kampuang kami ka Kajai
Dari Kajai lansuang ka Talu
Di Sinuruik kami bamalam
Di sinan rajonyo balahan kito
Iyo Tuanku nan di sinan
Barasa dari Parik Batu
Dari Sinuruik ka Simpang Tonang
Dari sinan taruih ka Panti
Maadok sabalah mudiak
Kami tibo di Sundata
Di sinan bamalam pulo
Di rumah dunsanak Buyuang Labiah
Sahinggo itu kami sanang
Dek indak batanyo tanyo
Nan mano jalan kan ditampuah
198
