Pagi buto sasudah itu
Barangkek ka Salibawan
Sampai kami di Kaluai
Taruih juo lai ka mudiak
Tibo di Batuang nan baririk
Hari sanjo kami bamalam
Bamalam di lapau sajo
Indak ado mah kandang kudo
Payah kudo digigik rangik
Tapaso kami maiduikkan api
Iyo di laman lapau nantun
Nagari indak gadang bana
Di sabalah kida' rimbo gadang
Tapaso pulo itu garan
Buyuang Labiah Malin Maulano
Baganti-ganti inyo lalok
Takuik api kok nyo padam
Kok inyiak rimbo mancium bau
Bau si Balang Hitam Manih
Kok datang inyo maintai
Bakajutan pulo katigonyo
Barisuaknyo pulo sudah itu
Kami barangkek mah ka Bateh
Dari Bateh taruih ka Bonjo
Bia hari alun lai malam
Bamalam pulo' kami sinan
Nagari tu iyo gadang
Kadai nasinyo gadang pulo
Di sinan ado kandang kudo
Ado unggun panjago rangik
Dapek kami bajalan-jalan
Maliek nagari urang nantun
Manjalang hari kalam bana
Bulan tarang pulo katiko tu
Banyak lapau kami masuaki
199
