Iyo si Udin sajo garan
Dipaso kami untuak makan
Bia kami manyȧbuik kanyang
Tampek tidua batilam rancak
Kudo kami dibari tampek
Sakandang jo kudonyo
Kami lai mambaok sagu
Tapi sagunyo diagiahkan
Untuak makanan kudo kami
Katiko kami kan barangkek
Kakak tinggakan iyo pitih
Inyo indak amuah manarimo
Dibuliakkan ka saku kakak
Anaknyo indak tampak pulo
Nan kan patuik diagiah pitih
Inyo mintak diaku sajo
Iyo dunsanak lahia batin
Kami bajalan pulo lai
Ka Jambu Aia Sungai Pua
Taruih lansuang ka Padang Panjang
Malalui jalan maminteh
Lubuak Gadang itu garan
Agak babelok mah saketek
Ka Koto Laweh Pandai Sikek
Ka Singgalang ka Padang Panjang
Lansuang kami hari tu juo
Ka nagari Palabihan
Di sinan kami bamalam
Di rumah rajonyo Tuanku Mudo
Ado mah pasan dari ayah
Untuak mancari urang iko
Sabab iyo andeh surinyo
Badunsanak mandeh jo ayah
201
