Dari nagari Palabihan
Labuah gadang nagari elok
Lubuak Aluang jo Sicincin
Lakeh sampai kami kamari
Dek kawan nan baduo
Alah panah pulo kamari
Basikuna dari Tiagan
Mudah kami mancari rumah ko
Baitu kisah pajalanan
Itu di laman kudo Upiak
Turun malah Upiak sabanta
Untuak basuo tu jo inyo
Antah inyo lai ingek juo
Kok indak ingek pado rupo
Mungkin ingek pado suaro
Lah turun tampak Reno Manih
Dibawonyo pulo sakapiang
Gulo anau pakirin andeh
Dicarinyo si Balang Candai
Sadang mangecek jo Buyuang Pamenan
Batigo dengan Hitam Manih
Diidunyo si Balang Candai
Iyo dek Upiak Reno Manih
Antok sajo kudo nantun
Bakato inyo muso nantun
Mano Diak Kanduang Balang Candai
Kok lupo Buyuang bakeh kakak
Kakak iyo mah taragak
Taragak naiak ka pungguang ang
Mandanga kato Payuang Lautk
Maringih kareh Balang Candai
Maringih bagai rang manangih
Manangih pulo Payuang Lauik
Buyuang sangko Upiak lah mati
202
