Sato koh Buyuang maantakan
Mayik kakak ka Pandam Rajo
Basalam kini Reno Manih
Jo Buyuang Labiah Malin Maulano
Diajak urang naiak rumah
Ado sabanta antaronyo
Malam tibo urang sambayang
Nasi mananti di hidangan
Lah sudah minum jo makan
Diantakan si Buyuang Labiah
Sarato kawan Malin Maulano
Karumah dunsanak nan tadakek
Iyo dek urang Buyuang Pamenan
Samalam malaman tu
Alah hampia bakukuak ayam
Dek urang tigo baradiak
Duduk bakaba babarito
Tantang apo nan tajadi
Pado diri surang-surang
Kadang-kadang inyo tagalak
Ado pulo nan tatangih
Talabiah Puti Payuang Lauik
Iyo bak ombak di Lautan
Kadang mahambuang bak galombang
Sudah itu riak di nan tanang
Beko baalun baombak pulo
Iyo dek mato amuahnyo buto
Iyo dek hati amuah mati
Tapi taragak itu garan
Kapado ayah jo andehnyo
Mambuek inyo paniang langau
Tapi urang nan baduo
Lai mah pandai mambujuaknyo
203
