Iyo jo kami baduo ko
Dayang-dayang nan mudo mudo
Pai surang pai baduo
Akianyo abih ka sadonyo
Abih kawin inyo garan
Baapo kami manahannyo
Nan sataun duo kudianko
Sajak kawin si Sari Alam
Iyo jo Puti Mambang Pulau
Adiak dek Tuanku Sasak
Kok paja tu datang kamari
Baru rumah ko rupo rumah
Alah tabukak sado tingkok
Indak lamo nyo di siko
Hanyo sahari duo pulo
Paliang lamo iyo sapakan
Si Sari Bulan jarang naiak
Inyo kan iyo indak pangecek
Talabiah sajak nyo baranak
Acok inyo di rumah sajo
Langang urang nagari ko
Sajak Upiak indak di siko
Nan paliang langang tarasonyo
Iyolah jalan ka tapian.
Daulu iyo rami bana
Tampek kalian bamain-main
Upiak jo kawan samo gadang
Sarato dayang mudo-mudo
Batu-batunyo lah balumuik
Di tapinyo lah tinggi rumpuik
Bungo-bungo lah habih mati
Ibo ati malieknyo
Andeh jarang mandi di sinan”
214
