”Usah Upiak pulo nan turun
Tampak baeko dek si Sari
Atau iyo dek andehnyo
Indak rasio tatutuik lai
Bia rang dapua nan disuruah
Si Sari Alam nan diimbau
Disuruah bawo mah kawannyo
Lah pai urang manjapuik
Bakato sanan Payuang Lauik
Manolah ayah kanduang Upiak
Sarato andeh sayang Upiak
Kok ado urang batanyo
Siapo kami iko garan
Katokan malah dek ayah jo andeh
Iyo adiak Tuanku Sasak
Adiak dek kakak Mambang Pulau
Dek ado mah saireh
Lai urang kan picayo
Kok buliah kami di siko
Iyo samalam duo malam
Barisuak kak Sutan iyo pai
Pai ka Sasak manjapuik nyo
Nak samo-samo kami siko
Alun ayah jo andehnyo
Manjawek kecek Payuang Lauik
Alah mah naiak Bujang Piaman
Inyo datang surang sajo
Baru sampai inyo manyambah
”Ampuniah ambo Tuanku Rajo
Ampunlah ambo Andeh Suri
Iyo kok ambo nan dijapuik
Baitu kato kak Sutan
Adokoh ambo diampuni
217
