Iyo barabab bakucapi
Sarato bacanang batalempong
Bagandang basuliang buluah
Iko iyo sakali sapakan
Tapi sadonyo bagadang hati
Mulo-mulo kato kak Marah
Inyo diimbau dek rajo sinan
Mangatokan ike indak elok
Tapi kudian-kudian ko
Inyo sandiri acok datang
Maliek gadih-gadih main
Sarato manari jo manyanyi
Kok di siko ambo isuak
Kok ado kakak bapitih
Ambo iyo mintak dibuekkan pulo
iyo rumah sarupo itu
Kalau indak dapek gadang bana
Sapaduo itu jadi diambo”
Lah duo pakan di ustano
Iyo si Payuang jo anaknyo
Lah datang garan Bujang Piaman
Manjapuik anak jo bininyo
Banyak inyo mambao barang
Untuak ayah jo andehnyo
Kain baju jo cawan piriang
Banyak pulo makan-makanan
Satato buah-buahan
Sahari sabalun pulang
Dibuek malah dek si Payuang
Iyo masakan rang Pasaman
Baraja inyo ka andehnyo
Dek inyo alun pandai bana
Randang paku campua jo ayam
Nan Tahan babulan-bulan
229
