Halaman:Bujang Piaman Jo Puti Payuang Lauik.pdf/246

Siang mangganggu ka karajo
Malam manjadi mimpi buruak

Sabagai pulo itu garan
Kok inyo turuik sajo elok-elok
Iyo lah pintak Sari Alam
Supayo manyuruah paja-paja tu
Lari sajo tangah malam
Lari sajo jauah-jauah
Antah ka Padang ka Piaman
Dek takuik disabuik urang
Awak ndak amuah maizinkan

Takana bana dek nyo garan
Kato-katonyo maso itu
Kato kalua jo hati berang
Labiah suko inyo garan
Maliek anak tu mati
Iyo mati mambunuah diri
Dari maliek inyo lari
Jo rang padagang ndak babangso
Kok indak dek cadiak Sari Alam
Ado jauhari bijaksano
Pandai tau nyo kironyo
Maelo rambuik dalam tapuang
Dek rambuik indaknyo putuih
Tapuang indak taserak pulo
Lai mah iduik kasadonyo
Sasa nan tingga itu kini
Iyo paralu manyimpan rasio
Kok panjaik sanang mambungkuihnyo
Iko urang ampek baranak

Hanyo untuang itu kini
Dapek tobaik pado Allah
Kok si Payuang mambunuah diri
Bujang Piaman mati pulo
Sabab dek kareh awak surang