Mangaja Puti Payuang Lauik
Jo darah ndak sanang hati ndak elok
Bia pajako ndak tau dinyo
Dek inyo baitu pulo
Alun panah basautan muluik
Tapi dek acok basuo tu mah garan
Hatinyo alah tatariak
Darahnyo tasirok gadang
Maliek si Payuang tatalungkuik
Tagalatak di tapi jalan
Indak mangana nyo rang kampuang
Si Payuang Puti anak rajo
Rajo Gadang di Pasaman
Inyo alah mambaliak badan si Payuang
Baru kakaknyo tibo pulo
Tangan si Bujang di bawah bahu
Iyo bahu Puti Payuang Lauik
Dielonyo lambek-lambek
Di gantikan tangan kak ajonyo
Alun talapeh tangannyotu
Si Payuang mambukak mato
Batamu pulo itu garan
Iyo mato samo mato
Antah nan ka barapo kali
Untuang si Bujang tau diri
Inyo indak bakato-kato
Bakato malah maso itu
Iyo kakak si Payuang Lauik
Nan banamo Sutan Sari Alam
Mano Diak Kanduang Payuang Lauik
Apo garan nan sakik
Adokoh tulang nan lah patah
Ataukoh dagiang nan lah luko
28
