Di ruang tangah iyo pulo
Di ujuang rumah tampek duduak
Iyo batirai balangik-langik
Babanta gadang kida suok
Babanta ketek nan baanggik
Sagalo banta itu garan
Basulam dangan banang ameh
Inyo diajak duduak sinan
Di bawah tirai-langik-langik
Di ateh banta nan rancak tu
Inyo mancaliak bakuliliang
Camin gadang tagantuang di dindiang
Lamari bacamin gadang pulo
Ado mah lampu minyak tanah
Tagantuang di tangah rumah
Tampek lilin sarupo bungo
Indak nan panuah itu lilinnyo
Tandonyo acok tu dipakai
Ado sabanta antaronyo
Lah datang hidangan dari balakang
Iyo di ateh talam tinggi
Tigo talam itu garan
Panuah barisi lauak-pauak
Diangkek uwaik tuduang saji
Bakato inyo maso itu
Mano Tuanku Puti Payuang
Makan kito agak saketek
Antah lai lamak samba ambo
Tuanku datang ndak disangko"
Manolah Uwaik janyo ambo
Alah naiak ambo garan
Iyo karumah uwaik nangko
Mangapo ambo indak amuah
51
