Saketek indak disangkokan
Jokok Tuanku Sutan iko
Memang lah acok juo datang
Tapi nuri di sangka ameh
Itu mangheran badan ambo"
Galak tasanyum Payuang Lauik
"Kok bulan jatuah ka bumi
Indak baapo itu garan
Bulan jo bumi samo hancua
Samo tanggalam kaduonyo
Ambo nan takuik itu garan
Kok bulan jatuah kalauik
Indakkan timbua-timbua lai."
Tambah tapikie Bidasari
Bakato inyo maso itu
Mano Tuanku Sutan Mudo
Lah tibo garan Bujang baduo
Marilah kito samo makan
Tuanku Puti nan mamintak
Lah lamo liau mananti
Makanlah urang maso itu
Ado pulo nan mangherankan
Si Puti inyo makan lamak
Sarupo di rumah mintuonyo
Duo kali inyo batambuah
"Lamak bana gulai uwaik
Tabik ruponyo salero awak
Lah acok indak makan lamak
Dek maliek si Balang sakik
Raso indak kan cegak lai"
Lorong kapado Bujang Piaman
Mulonyo payah nyo malulua
Diramehnyo nasi lamo-lamo
Baru dibawo kamuluiknyo
53
