Jo Tuanku jo Puti bagai
Ambo ko bukan doh rajo
Indakkan panah jadi rajo
Atau manjadi bini rajo
Kito ko samo manusia
Mamintak kasiah ambo siko
Imbaukan ambo si Payuang
Nan elok si Upiak sajo
Tando lai sayang bakeh ambo."
Indak inyo dapek bakato lai
Aia matonyo bacucuran
Maraok inyo ka banta
Manangih taisak-isak
Tagak nyo garan Bidasari
Dipaluaknyo paja rancak tu
Bakato inyo maso itu
"Mano nak kanduang paja rancak
Mangkuto nagari Parik Batu
Pamenan urang nan banyak ko
Mancaliak sajo rang lah kanyang
Kok kunun dapek samo makan
Mamintak kasiah upiak ka ambo
Ambo ko urang hino dino
Bukan dek ambo indak amuah
Dek takuik bana ambo garan
Kakak Upiak kan gilo surang
Dibuai baruak barayun
Kok iyo amuah samo tajun
Ambo manyokong dari balakang
Sajak maanta Balang Candai
Upiak sajo nan di muluiknyo
Taruih sajo uwaik katokan
Urang ndak tau didirinyo
Bak pungguak marindukan bulan
62
