Ado pado suatu hari
Mamintak si Payuang itu garan
Pado andeh jo ayahnyo
Mamintak pai tu bakudo
Bakudo kanagari Kajai
Dek salamo inyo gadang
Alun panah ka nagari urang
Rajo ndak namuah nyo malapeh
Ado mukasuik tu mah garan
Kan mamancang galanggang taun itu
Galanggang untuak Payuang Lauik
Mancari urang kan tunangan
Marengek Puti Payuang Lauik
Dek itu inyo ingin bana
Kalua kampuang gak sabanta
Kok lah tibo maso galanggang
Inyo akan dipingik bana
Indak buliah kalua rumah
Inyo iyo upiak ka sayangan
Kandaknyo tatap balaku
Pintaknyo indak nan batulak
Dibuliahkan inyo pai
Tapi indak baduo sajo
Jo kakaknyo Sutan Sari Alam
Haruih batigo jo dubalang
Lorong dek Sutan Sari Alam
Dicari dubalang jo nan mudo
Nan biaso patuah ka inyo
Dibawo sato pai bajalan
Bajalan ka nagari Kajai
Pado maso katiko itu
Alun lai ado bendi padati
Kok urang bajalan jauah
68
