Mamintak urang pado dubalang
Usah rasioko tabukak
Kok tabukak iko isuak
Nyawo di badan imbangannyo
Tapi kok lai mah tatutuik
Urang kan lai mangana jaso
Bakato sanan si dubalang
Bakato inyo sambia galak
Mangapo takuik kaambo
Ambo kan iyo mudo pulo
Lai taraso tu dek ambo
Baapo hati rang mudo-mudo
Acoknyo kawan ka Ustano
Lah tabayang tu dek ambo
Bakato pulo Bujang Piaman
Mano mamak dubalang Ustano
Sananglah pulo hati ambo
Mamak lai maraso pulo
Baapo kami rang ketek ko
Dapek mangicok iduik mudo
Iyo jo urang gadang-gadang
Iko ado pitih saketek
Kan pambali rokok Mamak
Mano rang mudo kato ambo
Usah malah ambo dibali
Usah ambo diagiah suok
Jo ati tuluih ambo garan
Iyo mamacik rasioko
Bakti ambo itu garan
Kapado Tuanku Sari Alam
Urang nan sangaik ambo puji
Baitu juo Tuanku Puti
Salalu elok jo ramahnyo
Kapado kami nan karajo
70
