Kapalo panuah jo pikiran
Tantang urang Bujang Piaman
Indak inyo bapikia panjang
Dipaluak adiak kasayangan
Labiah areknyo itu garan
Dari paluakan nan daulu
Dek inyo kini samo tau
Baapo hati masing-masiang
Bakato sanan Bujang Piaman
"Kok dapek pintak jo pinto
Kakak ingin manjadi alang
Upiak manjadi anak ayam
Kakak gunggung dibawo tabang
Itan kaateh awan tinggi"
"Indak di ambo itu kakak
Untuak manjadi anak ayam
Kakak lulua ambo baeko
Ambo ingin manjadi nuri
Kakak manjadi buruang bayan
Samo tabang naiak kaawan"
Tagalak sanan si Bujang kito
"Mangapo adiak ka kakak makan
Dilulua ditalan habih
Adiak sayang kakawan iduik
Kan banta kan kalang ulu
Kan tungkek wakatu bajalan."
Indak katuju tu dek ambo
Jadi banta jo kalang ulu
Barek di ambo kapalo kakak
Indak amuah Upiak dangai
Ka manjadi tungkek kakak
Iyo dek ambo nan nak basanda
Nak balinduang nak bataduah
73
