Antah tangih karano suko
Antah tangih sabab dek arok
Antah pulo dėk sangaik cameh
Inyo sandiri indak tau.
Lorong kapado Malin Duano
Tatakua sajo inyo garan
Indak ado nan ka disabuik
Hatinyo sarupo jo Bidasari
Ado harok ado camehnyo
Manolah Mamak dubalang ustano
Mari kito baliak ka rumah
Di rumah mangecek-ngecek
Sambia marokok makan siriah
Mano Bapak Malin Duano
Ambo iyo kan naiak juo
Mamintak banta pado uwaik
Nak lalok agak sakalok
Malam cako ambo kurang lalok
Dek maota jo Tuanku Sutan
Sarato urang jago malam
Sabagai pulo itu garan
Ambo takuik juo saketek
Basuo jo dubalang lain
Kok inyo tau ambo ka Kajai
Tapi malala juo siko
Asiang pulo nan ka tasuo
Kok banyak tanyo jaweknyo
Naiaklah urang tu karumah gadang
Indak maota makan siriah
Masiang-masiang jo pikirannyo
Si Malin mancari juo
Iyo banta kalang ulu
Indak kakadai inyo garan
72
