Di bawah katiak kakak."
Batambah kareh galak si Bujang
Kok nak teruih di bawah katiak sajo
Di kudoko sajo kito hiduik
Iyo saroman kini nangko
Siang malam pagi jo patang
Usah kito turun-turun lai"
"Iyo baiko nan ka tuju
Iyo baiko nan ka sanang
Kok buliah bak kato kakak cako
Usah kito turun turun lai
Dari pungguang Hitam Manih ko”
Si Bujang indak manjawek lai
Maliek si Payuang ka mukonyo
Aia matonyo bacucuran
Lah kanai pulo muko gadih tu
Tacangang si Payuang maso itu
Manolah kakak sayang ambo
Mangapo garan kakak manangih
Sajak tadi kakak galak kareh
Bak urang dapek kamanangan
Kini saroman kamatian
Rusuah risau ambo kironyo
"Mano Diak sayang buah hati
Tibo sajo raso cameh
Raso ambo sadang bamimpi
Saraso kakak di langik tinggi
Kok tajatuah beko ka bumi
Tasintak kakak dari lalok
Hancua rasonyo paratian
Iyo mangana nan bak kian
Talampau talonjak hati cako ko
Antah apo nan ka tajadi
74
