Antah apo nan ka manimpo
Dek itu hilang galak kakak
Baganti jo cameh rusuah risau"
"Manolah kakak kanduang ambo
Usah diubah hari sahari ko
Jo pikiran nan buruak-buruak
Biakan ambo maraso sanang
Di dalam paluakan kakak
Biapun iko hanyo sakaliko
Kok tajun kito masuak jurang
Sakubua kito di dalamnyo
Samiang Upiak ndak manyasa
Indakkan ado itu kakak
Anak rajo di nagari kito
Nan ka mancubo nan bak iko
Mancaliak sajo nyo ndak buliah
Iyo ka urang laki-laki
Bia urang tu tunangannyo
Ambo kini di awan tinggi
Usah dibawo ambo barusuah
Kok salah kakak mamacik tali
Iyo jatuah kito ka jurang
Liek dek kakak, kakak ambo
Kak kanduang Sutan Sari Alam
Barapo sayangnyo bakeh ambo
Ingin maliek ambo sanang
Kok tibo di kakak urang lain
Inyo bana nan ka kareh
Mancikaraui soal adiaknyo
Liektu kakak Sari Bulan
Adiaknyo kakak Lembak Tuah
Lah ampek taun nyo bakuruang
Indak panah mamijak tanah
75
