Didapeki uwaik yo lah siap
Jo edangan sapanuah rumah
Angku Kali lah ado pulo
Sarato sasi nan dijapuik
Duduak di bawah tirai nan baru
Baitu juo langik-langik
Saroman urang baralek gadang
Hanyo aleknyo nan tak ado
Indak kito panjangkan kisah
Satibo Upiak Reno Manih
Disuruah inyo pakai kabaya
Disuntiang rambuiknyo yo saketek
Si Bujang alah bapakai pulo
Lah duduak urang kasadonyo
Di bawah tirai langik-langik
Dilansuangkan malah akaik nikah
Bakato sakada nan paralu
Haniang tanang di tangah rumah
Balain bana itu garan
Jo alek nan biaso ko
Usahkan galak nan badarai
Kecek sajo hampia ndak tadanga
Dalam sabanta itu kawan
Lah sudah salasai kasadonyo
Maalum pado maso itu
Alun basurek batando tangan
Alah mah salasai akaik nikah
Lah makan urang kasadonyo
Dikapua siriah sakapua surang
Kini manyambah marapulai
Pado urang nan duduak tu
Manyambah pulo anak daro
Jo aia mato bacucuran
Lah turun garan Angku Kali
88
