Kok indak takana dek Tuanku
Sarato Tuanku Andeh Suri
Lah patuik kami maingekkan
Kini lah jatuah dari Tuanku
Samo suko kami manampuang
Padi jo taranak Tuanku sabuik
Nan paralu tu baeko
Itu iyo tangguangan kami
Sajak inyo baturun mandi
Alun lai naiak di rumahko
Alunlah ado nan maanta
Bareh sarato jo taranak
Iyo karumah gadang nangko
Satangah ado nan babaso
Maantakan bareh padi baru
Barang sacupak duo cupak
Sabanyaknyo duo tigo sukek
Nan lain aniang-aniang sajo
Ndak ado dubalang nan mamintak
Kami mah lai tau juo
Ado garan nagari lain
Rajo mamintak ka rakyaik
Sabanyak zakat nan kalua
Iyo tiok-tiok taun
Di nagari kito nangko
Indak ado nan bak kian
Tuanku punyo sawah surang
Dikarajokan urang upahan
Paisi rangkiang si Tinjau Lauik
Makanan urang rumah gadangko
Kok ado bana rang sarayo
Nan bakarajo sakali-sakali
Siapo suko mah nan datang
96
