Lorong kapado Puti Bungsu, kalau indak denai tolong, alamat Puti Bungsu mati hanyuik, kok indak mati katakutan. Cubo pikia di Bundo Kanduang, Puti Bungsu mamintak tolong, manuruik pikiran hati denai, tandonyo awak manusia, suko manolong urang hanyuik, sungguah pun bak itu kato denai, pulang maklum pado Bundo.”
Mandanga curito Cindua Mato, sanan tamanuang Bundo Kanduang, Dang Tuanku galak malengah, maliek cando Dang Tuanku, badatak pikiran Bundo Kanduang, bakato-kato dalam hati, ruponyo si Buyuang nan baduo, alah mupakat sajak dahulu, ado udang di baliak batu.
Bakato Bundo Kanduang, “Mano Buyuang Cindua Mato, kalau bak itu nan tajadi, susah denai mamutuihkan, karano alah di lua janji, bakisa karang jo buatan, tantang lawik-lawik sajo, tantang darek-darek juo, usah elok di awak sajo, pikia pulo hamba rakyat, paliharo nagari kan binaso.”
Mandanga kato Bundo Kanduang, galak tasanyum Dang Tuanku, batambah susah hatinyo Bundo Kanduang, lalu batitah jo mamberang, “Lain bana anak nangko, urang susah inyo galak, ruponyo anak indak bamalu, iko moh anak kurang taratik, kok tak suko Ampek Balai, manarimo nan bak nangko, langik tinggi ka disungu, lawik gadang ka dibaka,” kato berang Bundo Kanduang.
Datang manyambah Dang Tuanku, “Ampun denai Bundo Kanduang, lorong kapado parkaro iko, kito pulangkan ka Basa-Basa, iyolah Basa Ampek Balai, buruak elok kito manuruik, Bundo nan usah cameh bana.”
“Mandanga kato nan bak kian, Bundo Kanduang indak manyahuik.
144
