Mupakat
Basa Ampek Balai
Kaba baraliah hanyo lai, sungguah baraliah sanan juo, iyo kapado Puti Bungsu, dalam Nagari Padang Gantiang, masuak ganggaman Tuan Kadi. Mupakat Gadang di Balai Basa, bahimpun Basa ka-ampeknyo, sarato Tuan Gadang di Batipuah, Pangulu nan Gadang Basa Batuah, sarato urang cadiak pandai, jimek alim jo ulama.
Kan iyo samaso itu, rami Nagari Padang Gantiang, maliek parkaro Cindua Mato, nan manggungguang mambaok tabang, malarikan Puti Bungsu, sanan bakato Tuan Kadi,
“Manolah kito nan Ampek Balai, apolah kato bicaro kito, lorong kapado si Buyuang Cindua Mato, tapijak di baro hitam tapak, tapijak di kapua putiah tapak, malangga karang jo buatan, manggungguang mambaok tabang, malarikan anak kamanakan urang, mambari malu Rajo Imbang jayo.
Manuruik janji nan dikarang, iyo padan nan diukua, maantakan kabau pambarian, iyoah kabau si Binuang, kapado Rajo Sikalawi, karano baliau ka baminantu, mangawinkan anak kanduangnyo, iyo si Upiak Puti Bungsu dangan Rajo Imbang Jayo.
Tando anak ado babako, diantakan bareh dangan pinang, sarato kabau si Binuang, nyatonyo barasak tuneh dari tunggua, si
146
