Binuang dibaok babaliak, gadih urang dilarikan pulo, tantu tajadi tuhuak parang, dangan Rajo Sungai Ngiang, lago duo lago tigo. Apo hukuman pado si Buyuang, iyo si Buyuang Cindua Mato, tasarah kapado karapatan.”
Tagak badiri Tuan Indomo, “Lorong kapado kato itu, itulah kato sabananyo, Cindua Mato maubah buatan, iyo mairik manantang malu, rumuak sangaik mamutuihkannyo, kito sarahkan kapado Rajo, kito mamintak hukum kapadonyo, iyo kapado Bundo Kanduang, sarato Daulat Dang Tuanku.”
Sanan manjawab Tuan Mangkudum, “Manolah kito nan barampek, batuka paham ambo kironyo, indak sasuai jo Indomo, lorong kapado parkaro iko, indak elok tagak di lua, nan babiduak karam sabalah, batapuak sabalah tangan, manuruik pikiran ambo, kalau Puti Bungsu indak tabaok, kito pun susah juo, labiah elok inyo tabaok.
Kalau didanga titah Dang Tuanku, samaso rapek di Pagaruyuang, maso malapeh Cindua Mato, Dang Tuanku ado batitah, mandanga Puti Bungsu ka kawin, sanang rasonyo paratian, bagai tamakan di lamang matah, sarupo taminum di ayia rawo, raso tatumbuak alu uncuang, kilek baliuanglah ka kaki, kilek camin lah ka muko, Dang Tuanku sangaik susah, karano kato bakieh baamakan.”
Bakato pulo Tuan Gadang, “Kalau bak itu kato nantun, samo sapaham malah kito, kalau Cindua Mato tadorong dalam adat, tadorong pulo malah kito, kalau talangkah dalam adat, talangkah pulo Ampek Balai.
Lorong kapado Cindua Mato, urang arif bijaksano, tahu di kato bakieh, ingek di kato nan ka sampai, tahu di sindia kato tabaliak, lawik aka talago budi, pandai mauji aka kito.
Tantangan sapihak lai, dikisa hetongan ka Puti Lenggo, Lenggogeni anak Bandaharo, kalau dihinok dihaniangkan, lah dakek hari kawinnyo, ruponyo Datuak Bandaharo handak mauji budi kito,
148
